ភ្នំពេញ៖ ក្រសួងព័ត៌មាន និងក្រសួងប្រៃសណីយ៍បានសហការគ្នាពង្រឹងកិច្ចសហប្រតិបត្តិការកាលពីកន្លងមក និងបន្តការងារឱ្យកាន់តែស៊ីជម្រៅបន្ថែមទៀតលើប្រព័ន្ធបច្ចេកទេសសោតទស្សន៍ និងទូរគមនាគមន៍។ ការឯកភាពពង្រឹងកិច្ចសហការនេះក្នុងជំនួបរវាងរដ្ឋមន្ត្រីព័ត៌មានលោក ខៀវ កាញារីទ្ធ និងរដ្ឋមន្ត្រីក្រសួងប្រៃសនីយ៍និងទូរគមនាគមន៍លោក ជា វ៉ាន់ដេត នៅព្រឹកថ្ងៃទី១១ ខែវិច្ឆិកា ឆ្នាំ២០២១ នៅទីស្ដីការក្រសួងព័ត៌មាន។

តាមការបញ្ជាក់របស់រដ្ឋលេខាធិការក្រសួងព័ត៌មានលោក កឹម គុណវឌ្ឍន៏ បានបញ្ចាក់ថា នៅពេលខាងមុខរដ្ឋមន្ត្រីក្រសួងទាំងពីរនឹងមានការចុះហត្ថលេខាលើសេចក្តីប្រកាសរួមសម្រាប់កិច្ចសហប្រតិបត្តិការនាពេលបច្ចុប្បន្ននិងពេលបន្តទៅមុខទៀតនៅក្នុងដំណាក់កាលដែលរាជរដ្ឋាភិបាលមានដំណើរការអភិវឌ្ឍខ្លាំងនៅក្នុងវិស័យព័ត៌មានវិទ្យាជាពិសេសក្នុងវិស័យឌីជីថល។

លោកបញ្ជាក់ថា៖ «សម្រាប់ការងារឌីជីថលនេះគឺជាកិច្ចការងារដ៏សំខាន់នឹងត្រូវបានការយកចិត្តទុកដាក់របស់ក្រសួងជំនាញទាំងពីរ គឺក្រសួងព័ត៌មាន និងក្រសួងប្រៃសណីយ៍និងទូរគមនាគមន៏» ។

រដ្ឋមន្ត្រីក្រសួងព័ត៌មាន និងក្រសួងប្រៃសនីយ៍ និងទូរគមនាគមន៍ ក៏បានចង្អុលបង្ហាញដល់មន្រ្តីជំនាញនៃក្រសួងទាំងពីរឱ្យសហប្រតិបត្តិការគ្នា កាន់តែជិតស្និតបន្ថែមទៀតពាក់ពន្ធ័ការងារបច្ចេកទេស ការងារជំនាញ ពិសេសវិស័យ សោតទស្សន៏ ផ្សព្វផ្សាយ និងទូរគមនាគមន៍ ឱ្យកាន់តែមានភាពរីកចំរើនបន្ថែមទៀតផងដែរ៕

^{PHOTO: TVK}